Festa di u ghjocu Aghjone 30 d’ottobre 2011 - Ghjacumu FUSINA
L’idea di scrive un libru nant’à i ghjochi anziani ci hè venuta à principiu di u decenniu di 1980 à Scola corsa di Bastia, associu d’insegnamentu è di prumuzione di a lingua corsa, cun Carlu Castellani chì ne era tandu secretariu generale. Per mio contu, era vultatu da Parigi à a fine di u 1981 ed eramu tandu in tempi di Riacquistu è si sà quant’ellu hà purtatu issu muvimentu populare à a spressione linguistica è culturale, à u cantu, à a literatura, à a crezione di spressione corsa in generale ind’a nostra isula. L’idea era in l’aria di sicuru è vucava assai in i mezi di a pedagugia postu chì l’annu 1981-82 currispundia appuntu à i primi passi d’insegnamentu strutturatu megliu, tantu ind’e scole primarie è ind’u secundariu di i cullegi è di i licei. Cunnoscu abbastanza bè a quistione chì era statu incaricatu eo d’una missione di u ministeru Savary d’issu cartulare difficiule per mette in ballu i testi officiali novi è avia u mo postu di travagliu à u Retturatu in Aiacciu, cum’è cuurdinatore accademicu.
Era quellu u cuntestu di l’epica è prugetti diversi ne nascia à palate : pensu à quelli ch’o cunnoscu benissimu per avecci messu a manu, cum’è per indettu, a publicazione di u grande dizziunariu di u Muntese, da l’editore Albiana. O ancu u prugrama generale di publicazioni pedagogiche da u CRDP-CDDP chì duvianu mette à dispusizione di i maestri documenti è libri ghjuvativi ind’e so scole d’ogni livellu. Principiava tuttu tandu è si sà cum’ellu si hè à pocu à pocu sviluppatu è assicuratu u muvimentu, ind’e scole è à l’università chì si festighjeghjanu quistannu i so trenta anni …certe volte cù impedimenti è difficultà pulitiche è suciali ch’ùn vale a pena à riveneci postu chì tuttognunu ben intesa e cunnosce oghje.
Pè rivene à quellu di u ghjocu, dopu una inquiesta di parechji mesi cù l’aiutu di e decine d’infurmatori vuluntariosi di participà à l’opera cumuna pobbimu fà esce quellu primu librettu subitu ind’u 1981 (eranu sole una sessantina di pagine, cù una cuprendula rossa, stampata à usu amatore è bricculatu di tandu) chì ebbe puru una accolta bona postu ch’ellu ci volse à ristampanne un antru più cumplettu di 122 pagine ind’u 1983 è ancu un secondu, più pulitu in furmatu più altu, una decina d’anni dopu, ind’u 1996.
U nostru scopu era di pruvà à fà rivive modi di ghjocu zitellini, pè u più oghje spariti, discrivenduli in modu precisu cù e so regule è illustrandu quand’ella era pussibule tantu i ghjochi chè i ghjoculi, è dinù i ghjucadori in azzione certe volte. Di quessa dinù mi n’arricordu benissimu chì m’avianu incaricatu non solu di fà certe ricerche nant’à l’origine di tal o tal ghjocu, ind’a storia generale ma dinù di fà i disegni à a mina secca pè dà una illustrazione più viva di u testu quand’ella era pussibule. U libru era assuciativu, militante è benevulente, cum’ella usava assai à quelli tempi : vale ciò ch’ellu vale ma si pò dì ch’ella hè stata una bona di publicallu postu ch’ellu ci ne hè statu altri subitu è assai dopu, nant’à listessa tematica : ùn citeraghju chè u bellissimu Appellamanu (esciutu à pocu pressu à listessa epica, in 1982), travagliu persunale di Petru Casanova, stitutore è direttore di scola, trattu ellu da i so propii cartulari di quand’ellu insegnava da giovanu segondu i metudi di a detta « Scola muderna » inventata da Célestin Freinet, assai cunnisciutu è praticatu ind’e scole ancu oghje.
O quellu più recente d’un antru insegnante, censore in ritirata dinù ellu, Sébastien Tomasi Nos vertes années (2008) chì mi dumandò di scrivene u prefaziu, in tantu chè anzianu cameratu di liceo. Ci hà d’altronde participatu dinù Ghjermana de Zerbi, l’autora di a famosa racolta Cantu nustrale.
Un ci vole sopr’à tuttu micca à scurdassi di u travagliu impurtante assai prudottu in guasi quaranta anni, da l’ADECEC di Cervioni, da u principiu cù u so presidente fundatore A.D.Monti chì avia dumandatu appuntu à u so amicu Petru Casanova di scrive un lessicu corsu francese di i ghjochi è di i ghjoculi, esciutu ind’u 1989. Issi picculi lessichi, parechje decine, sò ghjuvativi assai è trattanu d’ogni duminiu tecnicu di a lingua (per indettu : a caccia, a vittura, u pallò, a filusufia, u vucabulariu di u sessu o a psiculugia…per ùn ramintà chè qualchì titulu cunnisciutu). Oghje l’ADECEC hè sempre attivu è travaglia sempre in modu militante pè a lingua postu ch’ellu hà messu in ballu una banca di dati infurmatizata detta Infcor ch’ellu si pò interrugà ancu nant’à i telefunini. In quant’à u nostru sugettu d’oghje l’associu cerviunincu hà prupostu st’estate un ghjocu magnificu, quellu di e sette famiglie in corsu.
U ghjocu
Une poche di qualità di u ghjocu sò adimesse da tuttognunu : quella di l’universalità, quella di l’anzianità (forse ch’ellu hè più vechju chè a cultura ella stessa, dice Huizinga ind’è u so famosu Homo Ludens), è ghjè prisente à ogni epica di u mondu è ind’e tutte e civiltà. Chì l’etimulugia ricolli à u « jocus » latinu (=ghjocu, macagna, trattu di spiritu) o ch’ellu fussi à spessu assuciatu à u « ludus» latinu (= allusione, illusione, qualificativu di l’azzione di ghjucà, tutti l’elementi custitutivi si ritrovanu di sicuru, cù un campu semanticu chì s’hè arricchitu assai cù u tempu è e pratiche.
S’omu vulessi prupone una sfinizione abbastanza larga si puderebbe seguità à Huizinga appuntu, spezialistu ricunnisciutu, chì u prisenta cum’è una attività vuluntare (ma cù i so limiti è e so regule) cù a cuscenza d’esse tandu (ghjuchendu) altrimente chè in a vita currente. A pratica tocca à tutti, zitelli è maiò, l’animali dinù è porta nantu à prove di sgualtrezza o di forza, di spiritu o d’azardu…ma u ghjocu porta in sè u so fine : si ghjoca per ghjucà è basta ! (postu ch’ellu ùn ghjova à guasi nunda, ancu s’ellu si pò vince qualchì misa, chì pruduzzione vera ùn ci ne hè). Per mustrà bè ch’ellu hè scantatu affattu di a vita currente hè una attività autonoma, cù e so leggi, e so regule è u so sistema custitutivu.
E classifiche di i ghjochi si ponu fà, ben intesa : quelli chì opponenu dui campi (detti agonistichi : cf. agôn = cumpetizione) per indettu ; quelli chì tenenu à l’azardu, a furtuna, a diccia (alea) ; quelli chì travestenu a persona (maschere), ecc. (cf. Roger Caillois). Si sà d’altronde chì i ghjochi ponu avè un scopu precisu, ponu visà à qualchissia o qualcosa direttamente, osinnò a so riprisentazione (Carnavà, per indettu)
E so funzioni suciali è e so virtù pedagogiche sò state indettate da u principiu : Platone loda i ghjochi educativi, a ginnastica, a musica, u ballu, u cantu, e curali…I pensadori grechi in generale incalcanu nant’à l’imitazione (mimesis) da chjuchi chì ghjovanu à i zitelli à l’amparera di ciò ch’elli facenu i maiò, o ancu l’arte di u discorsu, a cunversazione, a litica è altri ghjochi di cumpetizione (cf. Aristote, ind’a Puetica).
I Rumani si sò ispirati assai di i Grechi ma quantunque pruibendu certi ghjochi periculosi per l’educazione è vantendune altri cum’è quelli di u circulu. In quantu à u cristianesimu, si connoscenu i so punti di vista murali chì s’avvicinanu di quelli d’Aristote, è ricumandanu a misura in ogni cosa : ghjochi di pallò, corse, scacchi si ponu praticà in ricreazione, ma essendu attenti à l’eccessi cundannevuli (e carte,i balli…per indettu)
Cù i tempi muderni ci hè statu un sviluppu smisuratu di u ghjocu in Auropa (carti, ghjochi d’azardu, lotterie…) U filosofu Pascal mettia in guardia contru à u « divertesi » ch’ùn saria chè « cunsulazione di e nostre miserie umane » è u ghjocu ùn saria chè una manera di ingannassi da pers è. Si cunnosce issa filusufia rigurista studiata ancu in iscola. Ma cum’ellu era dinù un matematicante tremendu (calculi di prubabilità) pobbe prupone una scumessa strana à quelli chì dubbitavanu di l’esistenza di Dio : « scumettite ch’ellu esiste, tantu ùn avete nunda à perdeci è tuttu à vincesi ». D’altronde l’idea di fà entre u calculu scentificu ind’e pratiche di u ghjocu hà interessatu subitu i cerbelloni : Leibnitz, per indettu hà studiatu a quistione ind’u « Trattatu matematicu di i ghjochi d’ogni modu » è hà prupostu duie categurie : quelli di ragione pura (scacchi, dame…) è quelli di mezu azardu (dadi…)
Aspetti suciulogichi oghjinchi : Pianu pianu u ghjocu hè statu analizatu da attività umana, non più sottu à l’angulu di a murale o di l’utilità ma di manera neutra, cum’è un fattu suciale specificu. Tandu si pò cunsiderà ch’ellu ci hè u ghjocu in ogni attività umana è si face cusì una rumpitura detta epistemulogica postu chì u ghjocu pò ancu esse adupratu cum’è strumentu d’analisi di a sucetà (ghjustizia, guerra, arte, attività suciali diverse, riti…) : sapendu chì tutta « istituzione funziuneghja d’una certa manera è in parte cum’è un ghjocu » pensava Caillois.
Dicia eo d’altronde in u prefaziu di quellu librettu di u 1983 : certe ipotesi di riflessione vanu luntanu chì ponenu u ghjocu cum’è origine è principiu di civilizazione è di cultura. Si sà di fatti a parte di l’asgiu, diceremu di l’oziu in a creatività : l’omu à l’oziu, ghjucaticciu, hè una persona viva, forse stuzzicarina ma spiritosa è maghjinativa assai. U tempu di u riposu sanu, quellu propiu di l’asgiu, currisponde più ch’ellu ùn si crede, à a cerca di vertai, à a scuperta di sè è di l’altri, à u cuntattu cù u mezu ingiraticciu, cù u mondu di e nuzioni fisiche è di a vita, quella di a persona (corpu) è quella di a mente.
Rileghjendu issu pezzu di prefaziu m’avvecu cum’ellu casca in incanti cù i valori di tradizione, di natura, d’eculugia…chì sò illustrati è messi in ballu quì.
Grazie à l’associ chì anu purtatu sta bella idea, à animatori tutti di cusì bella ghjurnata, chì ci hà permessu di intravede cum’ella puderebbe cambià andatura a nostra vita umana pigliendu in contu une poche di pratiche (di u ghjocu, di u cunsumu, di a manera di pensà, di a respunsabilità individuale è cullettiva…) chì indettanu da per elle, cù u sensu di u scambiu è di a spartera, un’antra filusufia eculogica, volesi dì in armunia bella cù u nostru ambiente naturale.
econatura
