U GHJOCU DI A CAPRA
Eccu un ghjocu d’issi tempi fà !
Oghje dimenticatu per a mudernita !
Zitelli smuniti di tante cose
D’isse s’epuche miseriose,
Per forza, o per necessità,
Anu cumbinatu un ghjocu
Semplice, ingeniosu è novu !
Incù arte è manera
Fattu senza straziera.
Un pezzacciu di legnu lisciu
Accumudatu incù duviziu,
Ritagliatu è spartutu in quattru
Catrichinu ben accunciatu !
A capra hè nata cusì
Senza cercà à capì !
Posta in terra, riceverà
A misa per potè ghjocà,
Ognunu vulerà abatte
Isse due teghie plate
Incu finezza aghjustate !
U vincitore allora serà
Quellu chì e ferà cascà
È issa misa serà u premiu
Per quellu chì sà tirà à segnu !
Paola –Colomba MAURIZI
A MORRA
A sera in paese à a stess’ora
Ghjuvan Paulu, tempu fora
Chjama à Dumè per una morra .
Per issu ghjocu d’accussentu
Ùn ci hè bisognu di tantu talentu,
È nissun’ preparazione !
Basta à esse vucialone
È ughjulà cum’è un sordu
Capu à capu , in accordu !
Duie !
Quattru !
Trè !
Morra !
Tocca à tè !
Cinque !
Ottu !
È trè !
Morra strida Dumè
D’issu ghjocu senza artifiziu
Ghjocavanu propriu senza viziu
Senza spende una baiocca
Ghjustu per esse chjocca a chjocca !
Paola-Colomba MAURIZI
econatura
